ایڈیٹر انچیف جنگ اور جیو نیٹ ورک میر شکیل الرحمٰن کی نیب کے ہاتھوں غیر قانونی حراست کے خلاف اقوام متحدہ میں درخواست دے دی گئی۔ دنیا میں انسانی حقوق کے وکلاء کی سب سے بڑی تنظیم امل کلونی کی ڈوٹی چیمبرز نے میر شکیل الرحمٰن کی غیر قانونی حراست کے خلاف درخواست دی۔ درخواست میں عالمی ادارے سے اپیل کی گئی ہے کہ اقوام متحدہ یقینی بنائے کہ حکومت پاکستان اور نیب عالمی قانون کی پاسداری کریں اور جنگ اور جیو کے ایڈیٹر انچیف میرشکیل الرحمٰن کو فوری رہا کیا جائے۔ ایسوسی ایشن فارانٹرنیشنل براڈ کاسٹنگ نے بھی کہا ہے کہ پاکستان کےسب سے بڑے میڈیا گروپ کے پرنسپل شیئر ہولڈر میر شکیل الرحمٰن کی گرفتاری کے سیاسی مقاصد ہیں۔ انہوں نے مزید کہا کہ اس کیس میں قانون کی پاسداری نہیں کی گئی، حکومت پاکستان میر شکیل الرحمٰن کو فوری رہا کرے۔
