کروناوائرس کے پھیلاؤ کے خدشے کے پیش نظر مسافروں کی آمد و رفت کم کرنے کے لیے پاکستان ریلوے نے17 (اپ اینڈ ڈاؤن ڈائریکشن میں مجموعی طور پر 34 ) ٹرینیں غیر معینہ مدت کے لیے معطل کر دیں۔
وفاقی وزیر ریلوے شیخ رشید احمد نے اسلام آباد سے جاری اپنے وڈیو پیغام میں اس کا اعلان کیا تھا، جس کا باضابطہ نوٹیفکیشن وزارت ریلوے نے جاری کردیا گیا ہے۔ ریلوے حکام کے مطابق بدھ 25 مارچ سے 11 ٹرینیں (اپ اینڈ ڈاؤن ملا کر مجموعی طور پر 22 ) بند کی جائیں گی، جن میں جناح ایکسپریس (لاہور تا کراچی)، سر سید ایکسپریس (راولپنڈی تا کراچی)، بولان میل (کوئٹہ تاکراچی)، موئن جودڑو ایکسپریس (کوٹری تا روہڑی)، تھل ایکسپریس (راولپنڈی تا ملتان)، ماروی پسنجر (میرپورخاص تا کھوکھراپار)، موسیٰ پاک (لاہور تا ملتان)، چناب ایکسپریس (سرگودھا تا لالہ موسیٰ)، فیصل آباد ایکسپریس (ملتان تا فیصل آباد)، سمن سرکار (حیدرآباد تا بدین) اور فیصل ایکسپریس (لاہور تا فیصل آباد) شامل ہیں۔ قبل ازیں 6 ٹرینیں(اپ اینڈ ڈاؤن ڈائریکشن میں مجموعی طور پر 12 ) اتوار 22 مارچ سے غیر معینہ مدت کے لیے معطل کردی گئیں، جن میں خوشحال خان خٹک ایکسپریس (پشاور تا کراچی)، اکبر ایکسپریس (لاہور تا کوئٹہ)، سندھ ایکسپریس (کراچی تا ملتان)، راوی ایکسپریس (لاہور تا شورکوٹ)، شاہ لطیف ایکسپریس (دھابیجی تا میرپورخاص ) اور روہی ایکسپریس (سکھر تا خانپور) شامل ہیں۔
ریلوے حکام کا کہنا ہے کہ اس وقت ٹرین کے ذریعےسفر کرنے والے مسافروں کی تعداد 2 لاکھ روزانہ سے کم ہو کر ایک لاکھ 60ہزارتک رہ گئی ہے، جبکہ ملک میں اس وقت اپ اینڈ ڈائون ڈائریکشن میں مجموعی طور پر ایک سو 34 ٹرینیں چل رہی تھیں، تاہم 34 کی معطلی کے بعد اب سو ٹرینیں روزانہ ٹریک پر چلا کریں گی۔ نیز 12 سے 15فریٹ (مال بردار) ٹرینیں معمول کے مطابق چلیں گی۔ انہوں نے آگاہ کیا کہ معطل ٹرینوں کے مسافر اسی ٹکٹ پر سفر کر سکتے ہیں یا ٹکٹس ری فنڈ بھی کروا سکتے ہیں، جبکہ پاکستان ریلوے معطل ہوئی ٹرینوں کے مسافروں کو اب تک 8 کروڑ روپے ری فنڈ کرچکا ہے۔
